Ээлжит бус чуулганы хуралдаан болох эсэх талаар МАН-ын бүлгийн дарга Д.Тогтохсүрэнгээс тодруулахад тэрээр “ УИХ-аас ирэх долоо хоногоос эхлэн гуравдугаар сарын 5-ны өдрийг хүртэл хэд, хэдэн хуулиар хэлэлцүүлэг зохион байгуулна. Энэ бол ээлжит бус чуулганыг хуралдуулах бэлтгэлийг хангаж буй юм. Гуравдугаар сарын 10-ны өдрөөс ээлжит бус чуулган хуралдах болов уу гэж бодож байна. Хэлэлцэх шаардлагатай асуудлууд нэлээн олон байгаа юм. Татварын багц хуулийг яаралтай баталж гаргах шаардлага бий. Бараа ажил үйлчилгээ, худалдан авах тухай хуулинд өөрчлөлт оруулах тухай хуулийг хэлэлцэхгүй бол болохгүй байна.

Бүтэн жил тендер зарлаж маргаан үүсгэж явсаар байтал улсын төсөвт үүссэн хөрөнгө оруулалтыг хэрэглэж чадахгүй болдог гашуун туршлага бий. Тиймээс энэ хуулийг яаравчлах шаардлага байна. Мөн Сонгуулийн тухай хуульд нэмэлт өөрчлөлт оруулах тухай асуудал байна. Тиймээс ээлжит бус чуулганыг гуравдугаар сар гарган хуралдуулаад үргэлжлүүлэн хаврын чуулганыг хуралдуулах болов уу гэсэн төсөөлөл байна” гэлээ.