Махны үнийг хөөрөгдөж байж болзошгүй хоёроос гурван компани байгаа гэх асуудлыг Тагнуулын Ерөнхий газар шалгах тухай мэдээллийг ЗГХЭГ-ын дарга Л.Оюун-Эрдэнэ анх зарласан. Монголын тагнуулын тусгай ажилтнууд мах экспортлогч аж ахуйн нэгжүүдэд “мөрдлөг” хийж, их хэмжээний мах нөөцөлснийг илрүүлснийг Үндэсний Олон нийтийн телевизээр дамжуулсан нь олон нийтийг шуугиулав.

Уг нь энэ бол тагнуулынхны биш Шударга өрсөлдөөн хэрэглэгчийн төлөө газрын хийх ажил. Мэргэжлийн хяналтын байгууллага махны үнэ “хаана, яагаад” хөөрөгдөөд байгааг хянаж дийлэхгүй байвал цагдаагийн байгууллага нь шалгах ёстой. Тэгээд ч ЗГХЭГ-ийн дарга тагнуулын байгууллагын нууц ажиллагааг төрийн индэр дээрээс олон нийтэд зарлаад зогсож байх нь үнэнд хэр нийцэх вэ. Харин махны үнэ шалтгаангүйгээр өссөн асуудалд хэн нэгэнд хэрэг тохохыг хүсвэл, тэр буруутан нь Засгийн газар өөрөө юм.

Учир нь байгалийн давагдашгүй хүчнээс эхлээд болзошгүй нөхцөл байдал тохиолдоход нөөцийн махыг хангалттай хэмжээнд бэлтгэж, махны хомсдол үүсэхээс сэргийлж, үнийг ямагт тогтвортой барих үүрэгтэй.Гэтэл хаврын хаварт үнэ хөөрөгдсөөр одоо махыг тансаг хэрэглээний жагсаалтад оруулчихлаа. Эцсийн эцэст махны үнэ өссөн шалтгаан нь өмнөд хөршийн хэдэн ченжээс болсон бол Засгийн газрын бодлого л сул байгааг харуулж буй хэрэг. Нөөцийн махыг өмнөх жилүүдэд 12 мянган тонноор бэлтгэж, хавар худалдаанд гаргадаг байсан бол өнөөжил ДӨРӨВХӨН МЯНГАН тонныг л бэлтгэсэн.

Нийлүүлэлт муу байхад эрэлт үүсэж, үнэ өсдөг нь зах зээлийн жам.

Үүнийг төрийн эрх баригчид биднээр хэлүүлэлтгүй мэдэх ёстой баймаар. Гэтэл ХХААХҮ-ийн сайд Ч.Улаан “Цаг агаарын нөхцөл байдлаас болж махны үнэ өсчихлөө” гэх ядруухан тайлбарыг хэлж суув. Мах нөөцлөх бэлтгэх, хадгалахад очих ёстой мөнгийг дээгүүрээ хувааж идчихээд, дараа нь доогуураа тагнуулын байгууллагад үүрэг өгч гүйцэтгэх ажиллагаа явуулах нь Засгийн газрын жүжиг юм. Эцэстээ тагнуулын байгууллагыг үүрэгдэн, сэтгүүлчтэй камертай зураглалтай шууд жүжиг тавиад хэсэг намжив.

Л.Оюун-Эрдэнэ ажил авснаасаа хойш олон том “сэдэв”-ийг барьж хөндсөн. Гэвч Л.Оюун-Эрдэнийн хийж байгаа ажлууд хуульд нийцэж, ёсзүйтэй нийлж, эцсийн үр дүн гарч зохицуулагдаж байгаа нь тун цөөхөн. Ер нь бол эрх мэдэл, албан тушаалаар далайлган, хүч түрсэн байдлаар асуудлыг шийдээд байгаад нь олон нийт шүүмжлэлтэй ханддаг.

Энэ удаад ч тэр нийгэмд өндрөө авсан том сэдвийн үзүүрээс атгаж аваад түрүүлж мэдэгдэл хийгээд нээлтийн салютаа буудаад попорчихлоо.

Түүнээс хойш мах зуун төгрөгөөр буусан үзүүлэлт, үр дүн одоо хүртэл алга. Махны үнийг өөрсдөө өсгөчихөөд, тусгай хүчний байгууллагыг хөдөлгөж махны үнийг буулгасан баатар болж попрох жүжиг гэдэг нь хэнд ч ойлгомжтой. ТЕГ үнэхээр далайцтай ажиллаж, нийслэлд өдөр тутам орж ирдэг махыг замаас нь хумсалдаг үйлдлийг зогсоосон бол махны үнэ өнөөдрөөс л шууд хямдрах учиртай байлаа. Өдөр тутам төрөөс нь тэсрэх бөмбөг нийгэмдээ “дэлбэлдэг”, “салют буудуулдаг” нийгэмд бид дасах учиргүй.

Иймд эхлэл дээр нь салют буудуулж чадсан Л.Оюун-Эрдэнэ дарга одоо ямар мэдэгдэл хийх бол гэдэг хүлээлттэй байна.