“Өвчин хэлж ирдэггүй, хийсч ирдэг” гэдэг. Үнэхээр ч "Covid-19" вирус Монголыг байтугай дэлхийг чичрүүлж байна. Өвчлөл тархахаас сэргийлж авсан олон арга хэмжээний дүнд Монголын эдийн засагт том хямрал нүүрлэх нь. Монголд коронавирусын халдвар Францын иргэнээр тээвэрлэгдэн орж ирснээс хойш дахин хөл хорио тогтоосон нь хувиараа хөдөлмөр эрхлэгчид болоод ААН-үүдэд хүндээр тусч байна. Одоогоор хөрөнгийн зах зээлд хувьцаануудын ханш унаж, аж үйлдвэрүүд сул зогсч, аж ахуйн нэгж, компаниуд их хэмжээний алдагдалд орж, цаашлаад төсвийн орлого тасалдахад хүрээд байна.

Чухам ийм хэцүү цаг үед боловсролыг мөнгө гэж хардаг хувийн сургуулиуд хүүхүүдээр дамжуулан эцэг эхээс нь төлбөрөө нэхэж эхэлжээ. ЕБС-ийн хичээл ороогүй бараг бүтэн улирлын хугацаа өнгөрч байхад хаалгаа хэдийн барьсан хувийн сургуулиуд төлбөр нэхэж байна. Мэдээж, хувийн сургууль болохоор өндөр төлбөртэй. ТЭд 4,5-10 сая төгрөгийн төлбөрийг нэхэж байгаа юм. Хичээл хэвийн явагдаж байсан бол эцэг эхчүүд төлөх ёстой гэдэг ухамсар хариуцлагаараа төлбөрийг нь төлж л таарна. Харин сургуульдаа суралгүй гэртээ карантинд байгаа тохиолдолд төлбөр төлөх ёсгүй. Аливаа үйлчилгээг аваагүй байж төлбөр хийдэггүй биз дээ. Жишээлбэл, та талх авсныхаа төлөө мөнгө төлдөг болохоос биш, талх нь ирээгүй байхад угаасаа авдаг юм чинь гэж мөнгө төлдөггүй шүү дээ. Түүн шиг нэг ч цагийн хичээл ороогүй байж, юуны төлбөр нэхээд байгаа хэрэг вэ. Үнэн хэрэгтээ энэ хичээлийн жилийн сургалтын нийт төлбөрийн 1/3-ийг өгөх хэмжээний дүр зураг л харагдаж байхад бүтэн жилийн төлбөр нэхэж байгаа нь ичгэвтэр үйлдэл.

Монголд чадарсанаасаа ядарсан нь олон. Хэдийгээр хоёр идэхгүй хоосон хонохгүй амьдралтай ч хүүхдийнхээ ирээдүйн төлөө зүтгэж, сайн боловсрол эзэмшүүлэхийн төлөө мэрийж, хоёр нарны хооронд хөдөлмөрлөж яваа эцэг эхчүүд олон бий. Тэд үлдэх үр хойчийнхоо төлөө байдгаа барьж, хувийн сургуульд төлбөр өндөртэй ч түүнтэй нь эвлэрээд явж байгаа. Тэдний ихэнх нь хувиараа хөдөлмөр эрхлэгчид. Гэтэл дэлхийг хямруулсан энэ цар тахлын үед урьдчилан сэргийлэх арга хэмжээ авч, хөл хорио тогтоосноор ихэнх нь ажил орлогогүй болоод гэртээ сууж байна. Тийм байхад хувийн сургуулиуд бүтэн төлбөр нэхэхээс ичих хэрэгтэй.

Баримт хэлье. Нийслэлийн хэмжээнд томуу, томуу төст өвчин амбулаторийн нийт үзлэгийн 10 хувийг эзэлж, аюултай түвшинд хүрсэнтэй холбоотойгоор Засгийн газар нэгдүгээр сарын 6-нд ерөнхий боловсролын сурагчдын II улирлын амралтыг долоо хоногоор сунгах шийдвэр гаргасан. Уг “хориг” дуусаж, сурагчид дөнгөж хичээлдээ ортол улсын хэмжээнд хөл хорио тогтоож, гуравдугаар сарын 2 хүртэл сургуулиудыг дахиад хаасан. Энэхүү хөл хориог дахин 28 хоногоор сунгах шийдвэрийг Засгийн газар хоёрдугаар сарын 19-нд гаргаж, хөл хорионы хугацааг гуравдугаар сарын 30 болгож сунгаад байгаа. Энэ хугацаанд нийт 402 удаагийн 6357 минутын 40 хичээлийг хөл хорионд сурагчдыг байх хугацаанд телевизээр заах болсон.

БСШУЯ-наас зохион байгуулсан энэ арга хэмжээнд хувийн сургуулиуд нэг ч төгрөг өгөөгүй байж, бүтэн төлбөр нэхээд суух ямар нүүр байна вэ. Хүүхдийнхээ төлбөрийг үг дуугүй төлж, хувийн сургуулиудын санхүүг бүрдүүлдэг эцэг эхчүүд орлогогүй байна. Гэтэл хувийн сургуулиа мөнгө угаах боломж гэж харсан, цаг үеийн бодит байдлаа үнэлж мэддэггүй хувийн сургуулийн үйл ажиллагаа явуулах эрхийг хаах хүртэл арга хэмжээ аваач! гэж хүсэх байна. Бас хувийн сургуулиуд улсаас хувьсах зардал авдаг гэдгийг ч нэмээд анхаарулмаар байна.

Аль эсвэл боловсролыг мөнгө гэж хардаг хувийн сургуулиуд цар тахлын үед төлбөр нэхэхээ зогсоо!