МҮХАҮТ-ын Ерөнхийлөгч О.Амартүвшин цаг үеийн асуудлаар мэдээлэл өглөө.

“НӨХЦӨЛ БАЙДАЛ ХҮНДЭРВЭЛ ЯДУУРЛЫН ТҮВШИН 50 ХУВИАС ИЛҮҮ ГАРНА”

“Эдийн засгаа аварцгаая. Ажлын байраа хамгаалцгаая” цахим жагсаал зохион байгууллаа. Та бүхний зүгээс тавьж байгаа шаардлага юу вэ?

-Ойролцоогоор 50 орчим мянган хүн ажилгүйдлийн эгнээ рүү шилжээд байна. Вирусын хорио цээр тогтоогоод 100 хонож байна. Бид дэлхий дахинаа жишиг болохуйц тэмцэж байгаа учраас арга хэлбэрийн хувьд сайшаалтай хандаж байгаа. Харамсалтай нь эдийн засгийн тал дээр хангалттай сан ажиллаж чадахгүй байна. Бусад улс, орнуудын тухайд жишиг болохуйц олон арга хэмжээг авч коронавирустэй тэмцэхийн хажуугаар эдийн засгаа хямралд оруулахгүйн тулд ихээхэн анхаарч ажиллаж байна. Өнгөрсөн 100 хоногийн хугацаанд хувийн хэвшил өөрсдөөсөө шалтгаалах бүхий л зүйлийг хийж ирлээ. Одоо төрийн шийдвэр байгаа оносон, зөв байгаад ААН болон иргэдийнхээ ажлын байрыг хамгаалахад чиглэсэн байгаасай гэж хүсэж байна. УИХ-ын сонгууль дөхөж байгаа учир бүх яамдын хариуцлага суларч, эдийн засгаа гаргуунд нь гаргана. Ярьж хэлэх зүйл нь сонгогчдоос санал авах тал руу чиглэнэ. Ингэх юм бол нөхцөл байдал илүү хүндэрнэ гэсэн үг. Ажилгүйдлын түвшингийн хувьд таван хүн тутмын нэг нь ажилгүй болохоор байгаа юм. Үүнийгээ дагаад ядуурлын түвшин 1,5 сая хүнийг хамрах буюу 50 хувиас илүү гарна. Үүнээс үүдэх хүндрэл коронавирусын хүндрэлээс хэдэн арав дахин илүү байх болно. 100 хоног гэдэг бол хангалттай цаг хугацаа алдсан гэсэн үг. Одоо өшөө илүү цаг алдалгүйгээр хамтдаа эдийн засгийн хямралыг даван туулахын төлөө ажиллахыг уриалж байна.

ТӨСВИЙН ТОДОТГОЛТОЙ ХОЛБООТОЙ ҮРГҮЙ ЗАРДЛАА ТАНААД ХӨНГӨЛӨЛТТЭЙ ЗЭЭЛ БОЛГОХ ХЭРЭГТЭЙ

-Засгийн газартай хамтарч эдийн засгийн хямралаа даван туулахад та бүхний зүгээс ямар оролцоотой байх вэ? Дэвшүүлж байгаа санал, төлөвлөгөөний тухайд?

-Дөрөвдүгээр сарын дунд үеэс эхлээд Монголын эдийн засгийн цикль эхэлдэг. Ерөнхийдөө 4-10 сар хүртэл эдийн засгийн гол салбарууд ажиллаж, 10-4 дүгээр сар хүртэл уналтад ордог. Идэвхжиж байгаа ийм цаг үед нь зам, барилга, хөдөө аж ахуй, уул уурхай, орон нутгийн дотоодын аялал жуулчлалыг дэмжсэн бодитой шийдвэр гаргаасай.

Нэгдүгээрт, Хязгаарлалтуудаа ухаалаг хийх хэрэгтэй. Бүхэлд нь хамааруулах нь зохимжгүй байна.

Хоёрдугаарт, Компаниуд урт хугацаатай , хөнгөлөлттэй зээлийг хүсэж байгаа. Зээлийн хүүгийн дарамт гэдэг бол ЖДҮ-ийн тухайд 40 орчим хувь байдаг. Маш өндөр тул компани дангаараа даван туулж чадахгүй. Иймд төр засгаас төсвийн тодотголтой холбоотой их хэмжээний үргүй зардлаа танаад хөнгөлөлттэй зээл болгочих. ЖДҮ-гийн зээл болон ипотекийн зээлээ санхүүжүүлээч. Дотооддоо хүнс үйлдвэрлэхийг дэмжих хэрэгтэй. Энэ нь буцаад эдийн засаг сэргэх үед бүгдэд хүртээмжтэй байна. Энэ хямралыг хувийн хэвшил дангаараа даван туулж чадахгүй. Төр засаг хувийн хэвшилгүйгээр дангаараа туулж чадахгүй. Иймээс хамтраад ухаалаг шийдвэр гаргаж, даван туулъя.

“КОМПАНИУДЫН БОРЛУУЛАЛТ 70 ХУВЬ ХҮРТЭЛХ ХЭМЖЭЭГЭЭР УНАСАН”

-МҮХАҮТ-иас эдийн засаг, бизнесийн чиглэлээр судалгаа явуулсан. Нөхцөл байдал ямар байна вэ?

-Бодит байдал дээр нөхцөл байдал маш хүнд байгаа. Нийт судалгаанд оролцсон компаниудын борлуулалт 70 хувь хүртэлх хэмжээгээр унасан. Ихэнх нь ажлын байрны цомхотгол хийсэн. Хүний нөөцийн компаниудын судалгаагаар хүний нөөцийн шинэ захиалга ирэхээ байсан талаар мэдээлсэн. Түр болон богино хугацаагаар хийгдсэн бүх гэрээнүүд цуцлагдсан учир нөхцөл байдал амаргүй байна. Эдийн засгийн эргэлт ирдэг үед нь анхаарахгүй бол энэ нөхцөл байдал улам хүндэрнэ. Цаг алдмааргүй байна.

НИЙГМИЙН ДААТГАЛЫН ШИМТГЭЛ ТӨЛӨГЧДИЙН ТОО 46 МЯНГААР БУУРЧЭЭ

-Одоогоор ажлын байргүй болчихсон хичнээн хүн байна вэ?

-Өнгөрсөн оны мөн үед Нийгмийн даатгалын шимтгэл төлж байсан төлөгчдийн тоог энэ оны гуравдугаар сарын 30-ныг хүртэлх үетэй харьцуулахад 46.500-аар буурсан байна. Цаашид үүнийг өсгөхгүй байх тал дээр анхаарах хэрэгтэй.