УИХ-ын ээлжит найм дахь удаагийн сонгуулийн санал хураалтыг улс орон даяар өглөөний 07 цагт эхлүүллээ. Энэ удаагийн сонгууль коронавирусын цар тахлын бодит эрсдэл дор зохиодож байгаа нь сонгогчдын ирц идэвхид нөлөөтэй байж болох талаар таамаглаж буй. Тиймээс сонгуулийн ирцийг шаардлага хангах түвшинд хүргэх нь сонгогч бидний үүрэг болж байна. Улс орон, дэлхий нийтийн эдийн засгийн үзүүлэлтүүд хасах тэмдэг рүү гудайж байгаа энэ цагт ирц бүрдэлтээс шалтгаалсан дахин сонгууль зарлуулж төсөв мөнгө үрэхгүй байхад иргэн бүрийн оролцоо чухал юм. Иргэд сонгогчид сонгуульдаа идэвхтэй оролцсоноор ирээдүйгээ өөрсдийн гараар баталгаажуулах сайхан боломж бүрдэх юм.

УИХ-ын өмнөх долоон удаагийн ээлжит сонгуулийн ирцийн дүнг харьцуулахад УИХ-ын 2012 оны сонгуульд сонгогчид хамгийн идэвх муутай оролцож байсан үзүүлэлттэй байна. Энэ үзүүлэлт чөлөөт сонгуулийн түүхэн дэх хамгийн бага ирцтэй буюу 65,2 хувьтай байсан нь анхаарал татах асуудлын нэг болж байв.

Сонгогчдын ирц муудсан шалтгааныг залуу сонгогчдын санал бага, идэвх муу байгаатай холбон тайлбарладаг. 2016 оны УИХ-ын сонгуульд 420 мянган залуус санал өгөх эрхтэй байснаас 50.8 хувь нь идэвхтэй оролцсон хэмээн Үндэсний статистакийн хорооноос мэдээлсэн байна. Өөрөөр хэлбэл 18-25 насны залуусын сонгуулийн идэвх хамгийн муу буюу хоёр хүн тутмын нэг нь л саналаа өгсөн гэсэн үг юм. Судалгааны дүнгээс харахад 18-35 хүртэлх насны залуусын 20 орчим хувь, 18-25 хүртэлх насны залуусын ердөө 10 хувь нь сонгуульд оролцдог гэсэн дүн гарчээ.

Манай улсын хүн амын 60 гаруй хувийг залуучууд бүрдүүлж байдаг. Залуусын оролцоо энэ хэвээр үргэлжилбэл өөрийн хүссэн нийгэмдээ амьдрах, орчноо бүрдүүлэх эрх нь үнэгүй болж мэднэ. Нийт сонгогчдын тал хувийг бүрдүүлж буй залуусын идэвх оролцооноос шалтгаалж сонгуулийн ирц хуульд заасан хэмжээнд хүрэх эсэх нь ихээхэн хамаарна. Иймд залуу сонгогч Та сонгуульдаа идэвхтэй оролцоорой. Сонгуулийн санал авах байрууд өглөөний 07.00 цагаас оройн 22.00 цаг хүртэлх хугацаанд нээлттэй байж иргэд сонгогч Та бүхний саналыг авах юм.