Өчигдөр шөнө гарсан ослоос үүдэж, Онцгой байдлын алба хаагч цэл залуухан 30 нас хүрээгүй гурван залуу харамсалтайгаар амь насаа алдаж, түлэнхийн төв дээр 14 хүн хүргэгдэн ирснээс таван хүн эрчимт эмчилгээний тасагт, таван хүн энгийн тасагт хэвтэн эмчлүүлж байна.

Галын улмаас гарсан хохирлын хэмжээг одоогоор тогтоох боломжгүй байгаа ч эрдэнэт хүний амь нас, эрүүл мэнд золиослогдсон нь үнэлж барамгүй гарз хохирол юм.

Ослын шалтгаан нөхцөлийг тодруулахаар алба хаагчид ажиллаж байгаа төдийгүй цахим орчинд ослын үеийн бичлэгтэй холбоотой хоёр талын байр суурь бий болоод байна.

Тодруулбал, аюултай ачаа тээвэрлэж яваа жолоочийн буруу гэж нэг хэсэг нь үзэж байгаа бол нөгөө нэг хэсэг нь том ачааны тээврийн хэрэгсэлтэй давхар эргэсэн жижиг тэрэгний жолоочийн буруу гэлцэж байгаа юм. Гэвч энэ бол энгийн нэг ядарсан, том тэрэгний жолоочид бүх бурууг өгөөд өнгөрөх асуудал биш юм. Бас нийгмээрээ нэг сэдэв барьж аваад долоо хоног тултал сэвээд мартах асуудал биш юм.

Өчигдрийн ослоор аюул бидний эргэн тойронд байгааг бүгд нүдээрээ харж, сэтгэл зүрхээрээ мэдэрлээ. Иймд алдааг засаж, буруутанг олъё гэвэл бид одоо байгаа Нийслэл хотын засаг дарга, Эрх барьж байгаа МАН-аас хайх ёстой. Шил толь шиг болсон замаар авто машин байтугай явган хүн ч алхаж байгаад бэртэж гэмтсээр өнөөдрийг хүрсэн.

Гэвч өдийг хүртэл хангалттай арга хэмжээ аваагүй улмаас өнөөдрийн нөхцөл байдалд хүрлээ. Иргэдийн зүгээс Хотын даргад хандаж шил толь шиг болсон зам дээрээ хангалттай хэмжээнд давс, хайрга чулуу цацаад өгөөч гэж гуйсан. Харамсалтай нь хангалттай арга хэмжээ аваагүй улмаас өчигдөр шөнийн осол гарч, эгэлгүй баатар гурван хөвүүнээ алдлаа. Цаашид дахиж хэдэн хүний амь насыг авч одож байж, ажлаа хийсэн шиг хийх юм бэ? Ард иргэд ч бас амандаа ус залгисан юм шиг хариуцлагаа нэхэж чадахгүй дүлий дүнг оргиж суусаар байх уу?

Б.АМИНА