Ялгаварлал гэж ямар нэг онцлогоор нь бусдаас дээгүүрт эсвэл доромжлон авч үзэхийг ерөнхийд нь нэрлэдэг нэршил. Амьтныг том жижиг, тарган туранхай гарал угсаагаа, ашигтай, ашиггүй, хөгшин, залуу эсэхээр нь ялгадаг нэршлийг хүмүүс бодож олсон. Харин жам ёсны онолоор бол бүгд тэгш эрхтэй ертөнцөд амьдрах гэж ирээд идэш тэжээл хайна.

Соёлт хүн төрөлхтөн амьтнаас ялгаатай ухамсартай, оюунлаг, гэгээрсэн гэж өөрсдийгөө үздэг мөртлөө харамсалтай өнөөдөр дэлхий ертөнцөд боолчлол, ялгаварлал, дайсагнал арилаагүй. Боолчлолыг тун эелдгээр “хөдөлмөрийн үнэлэмжгүй” байдал хэмээн гоёчилдог хэр нь үнэндээ бусдын хөдөлмөр хэн нэгэн хямдхан сорж тэр хөлс хүчээр өөрсдөө баян амьдарч байна гэж эндүүрдэг.

Монгол залуус эх орондоо олон улсын жишигт нийцсэн орчин нөхцөлд хөдөлмөрлөж, үр дүн, ирээдүйн төлөө урам зоригтой ажиллах итгэл үнэмшлээ авч, гэр бүлдээ ч ирээдүйдээ ч санаа зовохгүйгээр хийж бүтээвэл тийм чадамж бүрэн бий.

Дэлхий хаана ч Монгол ажилчин авахдаа дургүйцдэггүй нь орчин нөхцөлдөө дасах, ачаалал даах, хурдан сурдаг гайхалтай чанарууд нь давтагдахгүй гэлцдэг. Гэтэл эх орондоо бүтээлчээр ажиллаж амьдрах чин эрмэлзлийг гагцхүү мөнгө төгрөг бус бүх төрлийн ялгаварлал мохоож байдаг юм.