Хувьчлал нэрээр хуучин нийгмийн хөрөнгийг үрэн таран хийж, шинэчлэл нэрээр шинэ цаг үеийн боломжуудыг хулгайлж хөлжсөн олигархи улс төрчдийн нохой санааных нь өчүүхэн шүлсээр голоо зогооцгоох монголчуудын аж амьдрал улам л доройтсоор. Ядуу нийгмийн үр дүн хүчирхийлэл байдаг нь харамсалтай.

2023 оны эхний улирлын тоо мэдээгээр гэр бүлийн хүчирхийллийн улмаас үйлдэгдсэн нийт гэмт хэргийн 51.8 хувь нь Улаанбаатар хотод, 48.2 хувь нь хөдөө орон нутагт үйлдэгдсэн бөгөөд 201 буюу 46.9 хувь нь согтуугаар, 33 буюу 7.7 хувь нь эмэгтэй хүн оролцож үйлдэгджээ Ажилгүй эрчүүд архидан согтуурч улмаар хүчирхийлэл үйлддэг. Ахуйн ядуурал сэтгэлгээний доройтол руу оруулж байна.

Хүмүүсийн сэтгэлгээг өөрчлөхийн тулд эхлээд нийгмийн соён гэгээрүүлэх бодлого хэрэгтэй гэдэг ч яг үнэндээ өнөө маргаашийн аж амьдралаа арай ядан аргацааж байгаа хүмүүст ямар нэг гэгээрэл, сэхээрэл ярих боломжгүй юм. …Ер нь хүний эрхийг хязгаарлах гол арга бол хүнийг өмчөөс нь салгах явдал юм.

Манайд энэ үйл явц нэлээд амжилттай явагдсан. Хүнийг өмчөөс нь салгасан. Тиймээс тэр хүн ямар ч эрхгүй болж байгаа юм. Яагаад гэвэл эн тэргүүний хэрэглэх зүйлээ алдаж байна. Энэ бүхнийг баталгаажуулахын тулд, хамгийн гол нь, хүний эрхийг хангахын тулд тэр хүнийг өмчтэй болгох, эрхийг баталгаажуулах ёстой.

Олон нийтийн дунд чөлөөт зах зээлийн тухай ойлголт засгийн газрын үйл ажиллагаанаас болж буруу ташаа ойлгогдон ардчилал идээшлээ олоогүй байхад ард олон түүнд эзэн болохоос татгалзах аюул учирч байгаатай холбоотой. Товчхондоо Монголчууд баялгийн жинхэнэ эзэд нь өөрсдөө, ямар нэг сайд дарга нар биш гэдгийг яс махаараа ойлгоцгоосон. Одоо эх орондоо эзэн байх эрхийнхээ төлөө ул суурьтай тэмцэх, эрх чөлөөгөө хамгаалах, баталгаажуулах, алдсанаа эргүүлж авах цаг болов уу?

Д.ЭНХБАТ