Цагдаагийн байгууллагад өчигдөр /2024.07.03/ 15.00 цагийн орчимд “Сэлбэ гол дотор нэг хүн доошоо харсан байдалтай хэвтэж байна” гэх дуудлага, мэдээлэл иржээ. Дуудлагын дагуу Сүхбаатар дүүргийн цагдаагийн газрын Нэгдүгээр хэлтсийн алба хаагчид шуурхай очиж шалгахад согтууруулах ундаа хэрэглэсэн 30 орчим насны эрэгтэй хүн, голын усанд доошоо харсан, ухаан алдсан, биеийн байдал хүнд үед нь алба хаагчид яаралтай анхан шатны тусламж үзүүлж, амийг нь аварсан байна. Тухайн иргэнийг ар гэрийнхэнд нь хүлээлгэж өгсөн бөгөөд биеийн байдал хэвийн байна гэж ЦЕГ-аас мэдээллээ.