Их Британийн Ноттинхэм Трентийн Их сургуулийн хэсэг эрдэмтэд адуу нь бодож байснаас илүү ухаантай амьтан болохыг туршилтаар тогтоожээ.

Тэд туршилтынхаа тайланг удахгүй “Applied Animal Behaviour Science” шинжлэх ухааны сэтгүүлд нийтлүүлэх юм байна.

“Өмнөх судалгаануудад адууг зөвхөн тухайн мөчид хариу үйлдэл үзүүлдэг, ирээдүйг харах, үйлдлээ урьдчилан төлөвлөх чадваргүй амьтан гэж үздэг байсан. Харин бидний судалгаагаар энэ амьтан үйлдлээ төлөвлөдөг, үр дагаврыг нь тооцдог болох нь харагдлаа” гэж эрдэмтдийн ахлагч Луйз Эванс ярьжээ.

Түүний баг 20 адууг гурван үе шаттай тоглоомд оролцуулан туршсан юм байна.

Эхний шатанд хамраараа товчинд хүрэхэд тэжээлээр урамшуулдаг тоглоом тоглуулжээ. Хоёр дахь шатанд уг тоглоомдоо “хориглох гэрэл” нэмсэн байна.

Тухайлбал тэжээлээр шагнахдаа гэрэл ассан үгүйг харгалздаг болж, зөвхөн гэрэл унтарсан байх үед товчинд хүрэхэд тэжээл өгдөг болгосон байна.

Гэвч адуунууд гэрлийг үл хайхран товчинд хүрсээр байжээ.

Гурав дахь шатанд “шийтгэл” нэмж, гэрэл ассан үед товчинд хүрсэн тохиолдолд тоглоомд оролцохыг нь хэсэг хугацаагаар завсарлуулдаг болсон байна.

Ингэж шийтгэл оноодог болсны дараа адуунуудын алдаа эрс багасаж, зөвхөн гэрэл унтарсан үед л товчинд хүрдэг болжээ.

“Тэр завсарлага бидний хүссэн үр дүнд хүрэхэд хангалттай нөлөөлж чадсан. Адуунууд тэр дороо ‘ОК. Дүрмээр тоглоцгооё’ гэсэн горимд шилжиж байсан” гэж Эванс ярьсан байна.

Ингэж стратегиа нэн даруй өөрчилж чадсан нь адууг төсөөлснөөс илүү өндөр танин мэдэхүйн чадвартайг харуулж байгааг судлаачид онцолжээ.

“Өмнө нь анзаарахгүй байсан зүйлээ сүүлд буруу байсныг ойлгоод өөрчилж байгаа нь тун сонирхолтой. Энэ зан чанар нь тэднийг ирээдүйгээ төлөвлөж, зорилгоо тодорхойлж чаддагийг харуулж байна” гэж Эванс тайлбарласан юм.

Уг судалгааны үр дүнд адууг ямар нэг зүйлд сургахдаа хатуу, албадсан арга техник хэрэглэх шаардлагагүй нь харагдсан тул энэ амьтны "арчилгаа маллагаанд хүнлэг байдлаар хандахад сайнаар нөлөөлнө" гэж судлаачид үзэж байна.

Эх сурвалж: The Guardian, IKON.MN