Украины Ерөнхийлөгч Владимир Зеленский ХБНГУ-ын “Bild” сонинд өгсөн ярилцлагадаа “Оросын Ерөнхийлөгч Владимир Путин энхийн шийдэлд хүрэхийг хүсдэггүй. Оросын тал Украины эсрэг түрэмгий үйлдлүүдээ үргэлжлүүлсээр байгаа бөгөөд Украины тал болон олон улсын хамтын нийгэмлэгийн энхийн шийдэл олох оролдлогыг үр дүнгүй болгож байна” гэж онцолжээ.

Зеленский “Оросын тал хүчирхийллээ үргэлжлүүлсээр байгаа нь Путины хамт энхийн тохиролцоонд хүрэх боломжгүйг харуулж байна. Орос улс Украины нутаг дэвсгэрийг эзлэн авсаар байгаа нь Путин энхийг хүсэхгүй байгааг илэрхийлсэн тод жишээ гэж үзэж байна" хэмээн хэлсэн аж.

Мөн тэрбээр “ОХУ-ын энхийн хэлэлцээрүүдэд оролцож буй гол зорилго нь үнэндээ энх тайванд хүрэх биш, харин АНУ-ын Ерөнхийлөгч Дональд Трампад ‘Орос, Украин хоёрын хооронд дипломат гүүр байгаа’ гэсэн сэтгэгдэл төрүүлж, Америкийн шинэ хориг арга хэмжээнээс зайлсхийх явдал” гэж хэлжээ. Түүний ярилцлага зургадугаар сарын 12-ны пүрэв гаригт нийтлэгдсэн байна.

Зеленский "Учир нь Путин үргэлж 'Бид хоорондоо ярилцаж л байна шүү дээ! Хэрвээ хориг тавибал хэлэлцээ цааш үргэлжлэхгүй шүү' гэж хэлж чадна" хэмээн тайлбарлаад, Кремлийн нэг зорилго нь Украин улсыг олон улсаас тусгаарлах явдал юм" гэж дурджээ.

Украины удирдагч "Хэрвээ түнш орнуудын дэмжлэггүйгээр дайн урт удаан хугацаагаар үргэлжилвэл энэ нь Путины хувьд хамгийн таатай хувилбар болно. Харин түншүүдийн дэмжлэгтэй, хориг арга хэмжээ бүхий урт хугацааны дайныг Путин тэвчиж чадахгүй" гэж онцлоод, барууны орнуудыг ОХУ-ын эсрэг хориг арга хэмжээгээ улам чангатгахыг уриалжээ.

Владимир Зеленский мөн АНУ-ын Ерөнхийлөгч Дональд Трамп өөрийг нь шүүмжилсэн талаар хэлэхдээ "Би бүх зүйлд хүлээцтэй ханддаг. Энэ бүхэн дайны төгсгөлийг ойртуулж чадах л бол би хүлээн авахад бэлэн байна. Ерөнхийлөгч Трамп өөрийн тактикийг сонгосон. Би хэнийг ч шүүхийг хүсэхгүй" гэж онцолсон байна.

Зеленский Дональд Трамптай Цагаан ордонд маргалдсаныхаа дараа АНУ-ын Ерөнхийлөгчийг шүүмжлэхээс зайлсхийж буйгаа анхааруулж, "Трампын хувьд дэлхийд энх тайван тогтоохоос илүү чухал зүйл байхгүй гэж би бодож байна" хэмээн хэлжээ.

Украины Ерөнхийлөгч Оросын талд ялалт ойрхон байгаа тухай мэдээллийг няцаагаад, “Украины зэвсэгт хүчнийхэн гурван долоо хоногийн турш Оросын шинэ довтолгоог амжилттай няцааж байна. Зөөлнөөр хэлбэл, оросууд ямар ч амжилт олоогүй байгаа юм” гэж мэдэгджээ.

Эх сурвалж: DW
Б.ЖАРГАЛ