-ХУРУУ ШИЛНИЙ АРГААР 300 ОРЧИМ ХҮҮХЭД МЭНДЭЛЖЭЭ-

Өнгөрсөн пүрэв гаригт (III/17)-ны өдөр Монгол улсад гурав дахь үр шилжүүлэн суулгах төв болон байгуулагдаж буй “Mon CL fertility center” эмэгтэйчүүдийн нөхөн үржихүйн төв эмнэлгийн нээлтийн арга хэмжээ боллоо.

Дэлхийн жишигт нийцсэн, Солонгос улсын сүүлийн үеийн тоног төхөөрөмж бүхий эмнэлэг ийн нээгдсэн нь үргүйдлийн асуудал тулгарсан хосууд алс холын орныг зорьж, цаг хугацаа, хөрөнгө мөнгө зарцуулах зэрэг хүндрэлтэй олон асуудлыг цогцоор шийдэх боломж бүрдэв. Өөрөөр хэлбэл тус үр шилжүүлэн суулгах төв нь үр шилжүүлэх бэлтгэл ажлаас эхлээд бяцхан үрээ өлгийдөн авах хүртэл бүх оношлогоо, шинжилгээ, эмчилгээг хийх юм.

Дэлхийн эрүүл мэндийн байгууллагаас хосууд 12 сар болон түүнээс дээш хугацаанд хамгаалалтгүй, тогтмол бэлгийн харьцаанд байхад жирэмслэхгүй бол үргүйдэл гэж тодорхойлсон байдаг аж.

“Mon CL fertility center” хоёрдугаар сарын 1-ний өдрөөс эхлэн эмэгтэйчүүдийн нөхөн үржихүйн төв эмнэлэг нь эх барих эмэгтэйчүүдийн үзлэг зөвөлгөөнөөс эхлээд хэт авиан оношлогоо, хөлдөөсөн үр хөврөл суулгах ажилбар, умайн хүзүүний нянгийн үрэвслийн шинжилгээ, умайн хүзүүний эсийн шинжилгээ гэх зэргээс эхлэн бүх төрлийн үзлэг оношлогоо эмчилгээ үзүүлэх цогц төв юм. Энэ эмнэлэг ашиглалтад орсноос хойш үр шилжүүлэн суулгах ажилбараар буюу хуруу шилний аргаар нийтдээ 10 гаруй гэр бүл үрийн зулай үнэрлэжээ.

-ҮР ШИЛЖҮҮЛЭН СУУЛГАХ АЖИЛБАР ЦОГЦООРОО 8-10 САЯ ТӨГРӨГ-

“Mon CL fertility center” эмэгтэйчүүдийн эмнэлгийн захирал доктор Бум Чай Чой-то ярилцлаа.

-Энэхүү үр шилжүүлэн суулгах төвийг яагаад Монголд нээх болов?

-Монгол улсын нэн тулгамдаж буй асуудал бол хүн амын өсөлт байна. Сүүлийн жилүүдэд агаарын бохирдол, эмэгтэйчүүдийн өвчин гэх зэрэг олон шалтгаанаас болж үргүйдэл маш их байгаа юм. Мөн үргүйдэл үүсч байгаагийн гол шалтгаан нь монгол эмэгтэйчүүд ихэнх нь хөдөлмөр эрхэлдэг учраас оройтсон гэрлэлт болон жирэмслэлт явагдаж байгаа. Энэ шалтаанаас гадна мөн насны байдлаас хамаараад үргүйдэл ихэсч байгаа юм. Мөн эмэгтэйчүүдийн өвчин болон хагалгааны дараахь үр дагавраас үүдэн үргүйдлийн наалданги үүсэх, үрийн суваг битүүрэх гэсэн асуудал тулгардаг. Эдгээрийг мэдээж эмчлэх боломжтой. Энэ эмнэлэгт хагалгааны аргаар болон дурангийн аргаар эмчилгээ хийж байна. Жирэмслэх боломжгүй эмэгтэйчүүдэд үр шилжүүлэн суулгах ажилбараар хүүхэдтэй болох эмчилгээ хийдэг.

-Үргүйдлийн асуудлаар гэр бүлүүд Солонгос улсыг зорьж байна гэлээ. Энэ талаар та юу хэлэх вэ?

-2010 оноос хойш маш олон монгол эмэгтэйг эмчилж үзлэгт хамруулсан байна. Өмнө нь маш олон гэр бүл Монголоос зорьж ирдэг байсан. Зургаан жилийн турш тасралтгүй энэ талын асуудалтай хүмүүс ирж ажилбар хийлгэсэн. Ийм учраас монголчуудад тулгамдаж буй асуудлын нэг нь үргүйдэл юм байна гэдгийг мэдэрсэн. Маш олон гэр бүл холын орныг зорьж, цаг хугацаа алдаж, санхүүгийн хувьд дарамт ихээр тулгардаг. Зургаан жилийн турш эх нялхасын төвтэй хамтран 300 орчим гэр бүлийг хүүхэдтэй болгосон байгаа. Цаашид хүүхэдтэй болох гэж байгаа гэр бүлүүдэд эх орондоо Солонгосын төвшинд ажилладаг эмнэлэгтэй болж, олон асуудлыг шийдэж өгч байгаадаа баяртай байна.

-Эмчилгээний зардал хэд байх вэ?

-Бүх эмчилгээ эм, тариа, хагалгаа ороод 8-10 сая орчим төгрөг болдог. Солонгос улсад үргүйдэл гэж оношлогдоод эмчийн бичиг гарсан бол эмчилгээний зардлын 50 хувийг дөрвөн удаа төрөөс даадаг. Харин Монгол улсын хувьд тийм хөнгөлөлт байхгүй ч гэсэн бидний зүгээс хамгийн доод үнийг барьж ажиллаж байна. Манай эмнэлгийн эмчилгээ болон ажилбарын хавьд 65 хувийн магадлалтай байдаг. Энэ нь дэлхийд хамгийн өндөр үзүүлэлт юм. Цаашид энэ үзүүлэлт технологиор Монголын бахархал болсон эмнэлэг болж, гадаад орнуудын анхаарлыг татаж, гадны орны иргэдийг эмчлүүлэхээр ирдэг болгох зорилго тавьж байна.

-МАНАЙ УЛСАД 10 ГЭР БҮЛИЙН 6 НЬ ҮРГҮЙДЛИЙН АСУУДАЛТАЙ БАЙНА-

“Mon CL fertility center” Монгол дахь салбар эмнэлгийн эмэгтэйчүүдийн их эмч Н.Нарангэрэлтэй цөөн хором ярилцлаа.

-Энэхүү эмнэлэг нээгдсэнээр ямар ач холбогдолтой вэ?

-Манай эмнэлэг хоёрдугаар сарын 1-нээс үйл ажиллагаагаа явуулж байна. Үүнээс өмнө 2010 оноос хойш дандаа Монголд эмчилгээгээ бэлтгээд, үр шилжүүлэн суулгах буюу өндгөн эс авах ажилбар Солонгос улсад хийгддэг байсан. Тэгэхээр эмчилгээний бэлтгэл ажлаас эхлээд өндгөн эс гаргаж авах, үр хөврөлийг умайд суулгах ажилбар, мөн хөөрхөн үрээ өлгийдөн авах хүртэл бүх ажил манай улсад хийгддэг болсонд маш их баяртай байна.

-Манай улсад үргүйдэл хэр их байдаг вэ?

-Энэ талын судалгаа хийгдэж байгаа. Судалгаагаар арван гэр бүлийн зургаа нь үргүйдэлтэй гэж оношлогдоод байна. Ер нь манай эмнэлгээр Солонгос дахь салбараар дамжиж хүүхэдтэй болсон 350 гаруй гэр бүл байгаа юм.

-Манайд үр шилжүүлэн суулгах эмнэлэг хоёр байдаг шүү дээ. Энэ эмнэлэг ямар ялгаатай вэ?

-Манай улсад 2010 оноос хойш Бум Чой эмч ирж үргүйдлийн асуудалтай гэр бүлүүдэд анх үзлэг шинжилгээ хийж эхэлсэн. Үргүйдэлтэй хос маш их байсан учраас байнга манай улсад эмчилгээ оношлогоо хийгээд, үүнийг эмчилж оношлохоос гадна эмч нарыг сургадаг байсан. Ангаахын оюутнуудыг тэтгэлгээр өөрийн улсын эмнэлэгт аваачиж сургасан. Мөн жил бүр сургалтын төлбөр төлдөг гэх мэтчилэн маш олон ажлуудыг хийдэг байсан. Энэ хүн манай улсын эрүүл мэндийн салбарт маш их ажил хийж байгаа юм. Мөн энэ эмнэлгийн ялгаа гэвэл Солонгос улсын хөрөнгө оруулалттай. Тэнд хийгдэж байгаа эмчилгээний төвшин, чанар, технологийг Монголд нэвтрүүлж байгаа нь маш том давуу тал юм.

-Эмэгтэйчүүд ихэвчлэн ямар шалтгааны улмаас үргүй болдог вэ?

-Үр шилжүүлэн суулгах ажилбар хийлгэж буй өвчтөнүүдийн дунд судалгаа явуулж үзэхэд монгол эмэгтэйчүүдэд хамгийн их элбэг тохиолдож байгаа шалтгаан нь гуурсан хоолойн эмгэг байсан. Энэ нь олон дахин хагалгаанд орсон ч юм уу, хэвлийн хөндийн идээт үрэвсэл болон олгойны хагалгаанд орсон гэх зэрэг шалтгаанаас болж наалданги их тохиолдож байгаа. Мөн дараа нь өндгөвчний үйл ажиллагааны алдагдал, цаашилбал халдвар үрэвслийн зэрэг шалтгаанууд хамгийн элбэг тохиолдож байна.

-Төрөлхийн үргүй эмэгтэй байдаг уу. Хэрхэн үр тээх боломжтой байдаг вэ?

-Байгаа. Төрөлхийн огт жирэмсэн болж чадахгүй хүмүүс байдаг. Ийм хүмүүс нь төрөлхийн умайн гажигтай, өндгөвчний дутагдалтай хүмүүс байдаг. Тэдгээр хүмүүсийг оношилж эмчилгээ хийснийхээ дараа хоёрдогчоор донор авах, умайн эмгэгийг хагалгаагаар авсны дараа жирэмслэх боломжтой.

-Үргүйдэл наснаас хамаарах уу?

-Үргүйдлийн шалтгаан, ажилбар тухайн эмэгтэйн наснаас шууд хамаардаг. Хэрвээ 35-аас дээш насныхан бол нөхөн үржихүйн наснаас давсан байдаг учраас аль болох хурдан жирэмслэх арга хэмжээ авахгүй бол өнгөвчинд байгаа өндгөн эсийн нөөц багасаад өөрөөрөө төрөх боломжгүй болдог. Сүүлийн үед өндгөвчний үйл ажиллагаа дутмагшилтай үргүйдсэн залуу гэр бүл маш их болсон.

-Өсвөр насны охид мэс ажилбар ихээр хийлгэсний улмаас эргээд гэр бүл төлөвлөх насандаа үргүйдэх тохиолдол их байна шүү дээ?

-Тийм байгаа нь үнэн. Өсвөр насны охид жирэмсэлчихээд аль нэг эмнэлэгт үр хөндөлт хийлгэсний дараа хүндрэл их гарч байна. Яагаад гэхээр умайн хүзүүг ямар нэг хэмжээгээр гэмтээдэг. Гэмтсэн тохиодолд наалданги үүсэх, эсвэл үр хөврөл умайн хөндийд тогтох чадваргүй болдог. Тэгэхээр залуу насандаа хоёрдогчоор үргүй болдог тохиолдол байдаг. Түүнчлэн гуурсан хоолойг гэмтээх магадлал өндөр.

-Нэг удаа үр суулгах ажилбар хийлгээд, дараа нь өөрөөрөө төрөх боломжтой юу?

-Умайн гуурсан хоолойн үрэвсэлтэй бол болохгүй. Яагаад гэхээр тэр гуурс гэмтсэн бол эргээд сэргэхдээ маш удаан байдаг. Ийм тохиолдолд дахин үр суулгах ажилбар хийлгэнэ гэсэн үг.

-Үр шилжүүлэн суулгах аргаар төрсөн хүүхдэд ямар нэгэн сөрөг нөлөө байгаа юу?

-Сөрөг нөлөө байхгүй. Учир нь хамгийн шилдэг эсүүдийг ялгаж суулгадаг учраас маш сэргэлэн хүүхэд төрдөг. Гэхдээ бэрхшээл зовлон туулж, удаан хугацаанд түүхтэй төрдөг учраас эцэг эхчүүд энхрийлдэг. Үүнээс болоод их эмзэг хүүхэд болж өсдөг.

У.УРАНЦЭЦЭГ

ГЭРЭЛ ЗУРГИЙГ: Н.АНХБАЯР