Нийслэл хотын нийтийн тээврийн чиглэл, маршрут, эргэлтийг өөрчлөн шинэчилж өнгөрсөн амралтын өдрүүдэд хэрэгжүүллээ. Гэвч энэ зохицуулалт амьдрал дээр тун оновчгүй,чирэгдэл учруулсан, түгжрэл нэмсэн байгаа нь харагдлаа. Богино эргэлтийн зохицуулалт төв замууд дээр чиглэлийн тээврийн урт автобусууд эргэх гэж хамаг цаг барж, замын бөглөрөл, ачаалал улам ихэсч тэсгим хүйтэнд ард түмэн автобусны буудал дээр осгох шахаж байна. Олон дамжиж суух хооронд өвлийн богино өдөр урсаж өнгөрөх ба энэ хооронд зам дээр түгжирсэн богино эргэлтийн автобусаа хүлээсээр улам л дордох бололтой. Нуухыг нь авах гээд нүдийг нь сохлов гэгчээр гар өргөөд зогсох такси ч байхгүй торгуульд өртөхөөс айцгаана.

Хотыг ийм харгис бүдүүлэг байдлаар удирдах нь засан хүмүүжүүлэх газрыг санагдуулам. Гулгаатай зам, мөсөн гудамж, өмхий үнэр, аюулын харанга дэлдэх агаарын бохирдол, тал хувь нь халаалтгүй мөсөн хөлдүүс автобус зам дээрээ гацах ийм нийслэлийг байгаагаас нь улам дордуулж иргэд хохирч байгаад хэн хариуцлага хүлээх вэ?

Улаанбаатар хотыг будилуу улс төрчид биш мэргэшсэн инженер, менежерүүд удирдаж, харин өнгөрсөн хугацааны асар их газрын наймаа, төсвийн хулгай, хохиролд хуулийн хариуцлага хүлээлгэх ажилд ЗГ-аас мэргэжлийн баг томилон ажлын хэсэг байгуулж шуурхай ажиллах шаардлага тулгарчээ. Хэрэв ийм арга хэмжээ авч чадахгүй бол хойтон өвөл гэхэд цахилгаан станцууд ачааллаа дийлэхгүй унтарч, агаарын бохирдлын улмаас хэдэн зуугаараа хиарч, хүнээ гэх өчүүхэн ч сэтгэлгүй бүдүүлэг хэрцгий улс төрч нарын гайгаар төсвийн мөнгө үрэн таран хийгдэн Монгол Улсын хүн амын дийлэнх хэсэг нь эмзэг байдалд орж аюултай нөхцөл байдал даамжирна.

Д.ЭНХБАТ