УИХ газрын тухай хуульд нэмэлт өөрчлөлт оруулахаар яригдаж байгаа бөгөөд нийслэлийн газар чөлөөлөлтийн эрх зүйн асуудлыг тодорхой болгосноор бүтээн байгуулалтын ажил саад тотгоргүй явагдана гэж Засгийн газар үзжээ. Улаанбаатар хотын хэмжээнд нийтийн хэрэгцээг харгалзан газар чөлөөлөлттэй холбогдох харилцааг тодорхой болгох саналыг УИХ-д гаргасан байна. Өөрөөр хэлбэл газар чөлөөлөх асуудлыг хууль журмаар нарийн зохицуулж, аливаа маргааныг захиргааны аргаар шийдвэрлэх чиглэл рүү орж байна гэсэн үг. “Тухайн хуулийн зохицуулалтыг хийснээр гэр хороололд орон сууцуудыг барих, бүтээн байгуулалтын бусад хүндрэл бэрхшээл арилна” гэж үзсэн нь араасаа эргэлзээ, асуултууд дагуулж байгаа юм.

Жишээ нь гэр хороололд орон сууц барих зорилгоор айлуудын хашааг гэр, байшинг чөлөөллөө гэхэд бүх айлууд эрх тэгшээр тухайн хөтөлбөрт хамрагдаж орох оронтой үлдэж чадах эсэх, сонгуулийн маргааш мартагдаж, ор мөргүй өөрчлөгддөг байдлаас үүдэн иргэд олноороо хохирч үлдвэл хариуцлага хохиролд хэн нөхөн төлбөр өгөх? зэрэг хүндхэн асуудлууд бий.

Нийслэл нэгдүгээр орлогч дарга П.Сайнзоригийн хэлсэнчлэн иргэдийн байшин барилгыг тодорхой жишиг үнээр үнэлэн нөхөн төлбөр олгох маягаар зохицуулалт хийгдэж газар чөлөөлөлтийг хийнэ гэх. Гэтэл газар, хашаандаа үл хөдлөх хөрөнгө байхгүй, гэр сууцтай өчнөөн мянган айлын эрх зөрчигдөх үү? гэдгийг асуух ёстой. “Асуудлыг шүүхэд шилжүүлэхгүйгээр богино хугацаанд шийдвэрлэдэг болох”-оос дарангуйлал ханхалж байгаа юм.

Иймд иргэдийн алга дарам газрыг улаан цагаан засаг төр нь дээрэмдэж авахаар хэлэлцэгдээд буй асуудалд хүн бүр идэвх оролцоогоо нэмэгдүүлэх шаардлага тулгараад байна уу? Үндсэн хуулиас давж, УИХ-Д захирагдамгүй Нийслэл, дүүргийн засаг дарга нартай болох гэж байгаа юм биш үү?

Энэ талаар хэд хэдэн УИХ-ын гишүүд ам нийлэн шуудрах болсон нь хардлагыг лавшруулах мэт. Аливаа асуудалд улс төрийн оноо цуглуулж хөөрүү хөсөргөн хандлагаар түргэн түүхий шийдвэр гаргаж ард нь түмэн олон хохирдог тохиолдлын тоо нэгээр нэмэгдэх вий.

Д.ЭНХБАТ