Манай улс 3.3 сая хүн амтай. Үүний 2.5 сая нь буюу 80 хувь гаднын аль нэг улс руу аялсан гэх судалгаа байна. Харин гаднын улсуудаас өнгөрсөн жил 529 мянга гаруй жуулчинг хүлээн авчээ. Энэ жил уг тоог өсгөх боломж бий эсэх талаар Нийслэлийн аялал жуулчлалын газрын орлогч дарга Ц.Энхтүвшинтэй ярилцлаа.

-Манай улсын аялал жуулчлалын салбарын өнөөгийн нөхцөл байдлын талаар яриагаа эхлүүлье?

-Өнгөрсөн жил Монгол улс 537 мянга гаруй жуулчинг хүлээн авсан. Энэ нь сүүлийн арван жилийн хамгийн өндөр үзүүлэлт юм. 2007 2017 оны хооронд жуулчдын тогтмол өсч байна. Аялал жуулчлалын салбар сүүлийн жилүүдэд нийлээд ахицтай байгаагийн нэг илрэл энэ болов уу. Монголчуудын хувьд богино хугацаагаар гаднын улс руу зорчих нь нэмэгдсэн. Мөн өвлийн улиралд дотоодын аялал, жуулчлалд идэвхтэй оролцож байгаа.

-Ажил хийхэд хүндрэлтэй асуудлууд гардаг нь мэдээж. Тулгамдсан яг ямар асуудлууд байна вэ?

-Манай улсад зун, намарт өдөрт олон улсын 22 онгоц зорчдог. Энэ нь аялал жуулчлалын хувьд хүндрэлтэй байдаг. Гадны авиа компаниудынхаа тоог нэмэх шаардлагатай гэж боддог. Жилд манай улсад ирж буй жуулчдын 44 хувь нь онгоцоор зорчдог гэсэн судалгаа байдаг. Тэгэхээр бид нэг сая жуулчин авахын тулд дор хаяж өдөрт олон улсын чиглэлийн 40 онгоц хүлээн авах ёстой. Зуны оргил үед нь 60 онгоц хүлээн авч байж жуулчдыг чирэгдэлгүй авчирна гэсэн үг. Гадны авиа компанийг оруулж ирвэл аялал жуулчлал нэмэгдэнэ гэж боддог. Аялал жуулчлалыг хөгжүүлэх нь дан ганц нэг салбарын ажил биш. Хамгийн түрүүнд дэд бүтцээ сайжруулах нь чухал юм. Салбарын хувьд нэгдүгээрт агаарын тээвэр, Хоёрдугаарт визны асуудлыг шийдвэрлэх ёстой. Манай улсын виз олгох журам нь өөрөө зөрчилтэй гэж үздэг. Тиймээс уг асуудлыг тодорхой болгож өгөх шаардлагатай.

- Манай улсад ирэх жуулчдын тоо өнгөрөгч жилд нэмэгдсэн гэж та хэллээ. Нэмэгдэхэд яг ямар хүчин зүйл нөлөөлсөн юм бол?

- Гурван жилийн өмнөөс зарим чиглэлд онгоц нэмж явуулдаг болсон. Тодруулбал, долоо хоногт хоёр онгоц хүлээн авдаг байсан бол гурав болж нэмэгдсэн. Энэ нь жуулчдын тоо эрс нэмэгдэхэд нөлөөлсөн. Хурал зөвлөгөөн олноор зохион байгуулсан нь ч нөлөөлсөн. Монголчуудын хувьд гадагшаа явах нь эрс нэмэгдсэн. Хоёр сая 500 мянган хүн гадагшаа аялсан байна шүү дээ. Хөдөө орон нутаг руу жилдээ гадаад, дотоодын 100 мянган гаруй иргэн зорчсон байна.

-Манай орны хувьд аялал жуулчлал нь улирлын чанартай. Тиймээс уг салбарт ажилладаг хүмүүсийг тогтмол ажлаар хангах асуудал нь тулгамдсан асуудал болсон. Та үүнд ямар байр, суурьтай байдаг вэ?

- Өвлийн улиралд жуулчдыг татахын тулд олон арга хэмжээг зохион байгуулж байгаа. Өвлийн улиралд агаарын тээврийг мөн л нэмж өгөх хэрэгтэй гэж би хэлдэг. Ингэж байж тогтмол ажлын байр бий болно. Мөн үйлчилгээний салбарын ашиг орлого нэмэгдэх юм. Ирэх жил жуулчдын тоог нэмэгдүүлэхийн тулд одооноос л ажлаа зөв томьёолох хэрэгтэй юм. Мөн 20 мянга гаруй иргэд гадагшаа ирж, очсон байна. Өвөл олон улсын чиглэлд 40 -н онгоц өдөртөө хөөрч, 40-н онгоц буух. Зуны улиралд 60 онгоц хөөрч буух давтамжтай болж байж 1 сая жуулчин авах боломжтой. Агаарын тээврээр үйлчилдэг авиа компаниудтай хийдэг нөхцлөө өвлийн улиралд ч явахаар зохицуулах хэрэгтэй гэж боддог.

-2020 онд нэг сая жуулчин хүлээн авах хүчин чадал бий юу?

-Манай улсын хувьд нэг сая жуулчин хүлээн авах боломжтой. Одоогийн байдлаар нийт буудлын 40 хувийг л ашиглаж байна. Үлдсэн хувь нь сул байна. Мөн зоогийн газруудын үйл ажиллагаа 10 сараас хойш уналтад ороод 5 сараас сайжирдаг гэх жишээний. Аялал жуулчлал нь нэг салбараас хамаардаггүй. Олон яамны хөдөлмөр хамтын ажиллагаанаас хамааралтай. Мөн дан ганц яам аялал жуулчлалыг хөгжүүлнэ гэвэл ихээхэн учир дутагдалтай. Эхлээд тэргүүлэх яам нь ЗТХЯ, ГХЯ гэх мэт олон яамдын хамтын хүчээр аялал жуулчлалын салбар хөгжих байгаа. Аялал жуулчлалын салбар нь мөнгө олдог салбар. Ашиг, орлогоороо уул, уурхайн салбарын дараа ордог. Тэгэхээр одооноос зөв өнцгөөс нь харж шинэ алхмуудыг хийж байж 2020 он гэхэд нэг сая жуулчдаа татах юм.

С.ПҮРЭВДОРЖ