Тусгаар тогтнолгүй эрх чөлөө гэж байхгүй. Улсын оршихуйн тулгуур цэг үзэл санаа улс төр, нийгмийн чөлөөт байдал, соёлын чөлөөт байдал, эдийн засгийн эрх чөлөө гэх мэтийн хүний жам ёсны эрхүүдэд суурилсан эрх зүйт ардчилсан төр тогтсон байхыг тоймлон ойлгож болдог.

1990 оноос хойш тогтсон ардчиллын зам мөр чөлөөтэй амьсгалж, хүссэнээ ярьж бичиж болдог эрх чөлөөг авч ирсэн ч хүн бүхэн амьжиргаагаа хэнээс ч хамааралгүй, хэнд ч боолчлогдохгүй өөрөө бие даан залгуулах хэмжээний тэгш боломж олгогдоогүй.

Сэтгэлгээний хувьд эхлээд хөгжих ёстой гэх ойлголтыг хүчтэй дэлгэрүүлж эдийн засгийн эрх чөлөөг мартагнуулах зарим оролдлого байдаг. Идэх хоол, өмсөх хувцас мэтийн наад захын амьжиргааны хэрэгсэл, үр хүүхэд сурч боловсрох, эх орондоо мөр бүтэн амьдрах боломжгүй л бол тэнд ямар нэг соён гэгээрлийн талаар яриад нэмэргүй юм.

Ард түмэнгүй газар нутаг, иргэнгүй төрд тусгаар улс гэх ойлголт байх боломжгүй бөгөөд дэлхийд дээгүүр ордог баялагтай Монгол улсдаа цөөхөн арван хүн хагартал баяждаг бус бүх Монголчууд улс гэртээ эзэн болох эрх чөлөөгөө эдлэх цаг үеийг өөрсдөө тэмцэж авч ирэх ёстой.

Амар тэмцэл гэж байхгүй ч түүхэндээ амаргүй тулгаралт олныг туулж тэмцэж ялж байсан Монголын ард түмэн дотоодын авлигадаа цэг тавьж тусгаар тогтнол, эрх чөлөөгөө бүрэн гүйцэт эдлэх боломж бий.

Үр хүүхдийнхээ ирээдүйн төлөө бас тэдний үр хүүхдийн төлөө , Монгол хүн эх орондоо эрх чөлөөтэй , сэтгэл тэнүүн жаргалтайгаар үүрд амьдран суух орон зайг мөнхөд хадгалахын төлөө Монголчууд бид одоо сэрэх , нэгдэх цаг иржээ.