Утаанаас үүдэлтэй уушгины өвчлөл, ханиад нь хатгалгаа болж хүндэрсэн хүүхдүүд дүүрэг болгоны эмнэлэг дээр дүүрэн байна. СХД-ийн нэгдсэн эмнэлгийн гадаа л гэхэд шөнө дунд машинууд гэрлээ гялалзуулан, дуут дохио хангинаж, эмнэлэг дотор хүүхдээ тэвэрч аврал эрэн бүлтгэнэх ээж аавуудын баргар царай нүд халтирам ба ор хүрэлцэхгүйн улмаас коридорт гудас дэвсээр хэвтэж байгаа эх нярай цөөнгүй харагдана.

Эцэг эхчүүдийн ярьж буйгаар хүүхдийн ханиалга хүндэрч халуурч, зовуурилан уйлагнаж шөнө унтаж чадахгүй байна. Эмнэлэг бараадахаар дараалал маш их учраас 4-5 цаг хүлээх тохиолдол бишгүй. Эмч нар ээлжилж ажиллан эмчилгээ үйлчилгээ хийж байгаа ч ачаалал буурахгүй байгаа нь илт байна.

Харин эмч, сувилагч нар: “...үзүүлж оношлуулах, эмчилгээ үйлчилгээ авахаар яаралтай тусламжийн төвөөр ирж байгаа иргэн бүрд аль болох хүрч ажиллахаар ээлжлэн ажиллаж байгаа боловч утаанаас үүдэлтэй уушгины үрэвсэл, ханиад, томуу, хатгалгаа улам ихсэж байна. Зарим үед ор хүрэлцэхгүй байгаа учраас яаралтай хэвтэн эмчлүүлэх шаардлагатай дархлаа сул, нярай хүүхдүүдийг ээжтэй нь хамт түр эмнэлгийн коридорт хэвтүүлж байгаад өрөө сулрахаар дотогш оруулж байгаа” гэсэн юм.

Сонгинохайрхан дүүргийн нэгдсэн эмнэлэг нь дүүргийн 157 мянган хүнд үйлчлэх хүчин чадалтай Олон улсын стандартад нийцсэн 250 ортой, орчин үеийн иж бүрэн тоног төхөөрөмжөөр тоноглогдсон гэдгээрээ онцлог юм. Тус эмнэлэгт нь СХД-ийн 19-р хороонд байрлалтай бөгөөд нийт 17667 мкв талбайтай, барилгын өндөр 22,3 метр, хоёр орц гарцтай, 183 машины зогсоолтой.

2020 оны 11 сард нээлтээ хийсэн тус эмнэлгийн нээлтэд ХЗДХЯ-ны сайд Х.Нямбаатар, ЭМЯ-ны Төрийн нарийн бичгийн дарга Ц.Эрдэнэбилэг, Азийн хөгжлийн банкны Монгол Улс дахь Суурин төлөөлөгч Павит Рамачандран, Нэгдсэн эмнэлгийн дарга Б.Галсанцэдэн болон бусад албаны хүмүүс оролцож байсан билээ. Гэвч улсын төсвийн хөрөнгөөр баригдсан тус эмнэлгийн хүчин чадал, орны хүрэлцээ дүүрэгт амьдардаг эх нярай коридорт хэвтэж эмчлүүлэх дээрээ тулчхаад байна. Энэ нь ханиад томууны дэгдэлтийн оргил үе болон утаа, агаарын бохирдлын аюултай нөхцөл байдал хэвийн хэмжээнээс давсантай холбоотой билээ.

Д.ЭНХБАТ