Монгол түмний уламжлалт цагаан сарын баяр тохиоход хэдхэн хоног үлдлээ. Өвлийг өнтэй давж урин хавартай золгон шинэ жилийн баяараа тэмдэглэж байгаа соёлын асар том нийлмэл баяр. Олон ариун ёс горимуудын дотроос шинэ жилдээ бусдад өр авлагагүй цагаалах, гэр орон хашаа хороогоо цэвэр цэмцгэр жилээ угтах уламжлал чухалд тооцогддог. Гэтэл олон хүчин зүйлээс хамааран уламжлалаа утга төгөлдөр хадгалан өр ширгүй, өвчин зовлонгүй хотлоороо амар жаргалантай байхын ерөөлийг л дэвшүүлэхээс бодит байдалд гэр гэгээ тодрох бололцоо бүрхэг байна.

Улсын нийт гадаад өр өнгөрсөн жилүүдийнхээс хэд дахин нэмэгдэж өр барагдууллаа гэх өнгөцхөн мэндчилгээтэй үнэндээ өрх бүрийн амьжиргаа өөдлөн дэвжих бололцоо хомс даржин жилүүдийг ардаа үдсээр.

Өвөг дээдсээс өвлөсөн ёс уламжлалаа дээдлэн хүндэтгэж идээгээ засан, амар мэндээ мэдэлцэж золгох нь зүйн хэрэг. Гэвч ахмад буурлууд нь тэтгэврийн зээлтэй, айл өрх аж ахуй нэгжүүд нь төрөл бүрийн өртэйгөөр үл барам банк санхүүгийн болхи тогтолцоонд мөлжүүлдэг байдал хэдий болтол үргэлжлэх вэ?

Эдийн засгийн сул дорой байдал үндэсний бахархал цагаан сарын баяр хоёр ямар холбоотой вэ гэхүл уламжлалдаа өр шир, уруудан доройтол, амьжиргааны идэвхгүй сулбагар байдлыг сэтгэлгээндээ шингээж, ямагт ажилч хичээнгүй, цовоо цалгиун, халгиж цалгин өгөөмөр баян байхын тухайд үлгэрлэн сургаж байсны тод жишээ бол цагаан сарын баяр.Гэтэл бид эртнээс уламжилсан энэ дархлаагаа бага багаар алдаж өр ширээ зузаатгаж баяр тэмдэглэдэг болчхоод байгаа билээ.

Д.ЭНХБАТ