УИХ-ын ээлжит сонгууль хаяанд ирсэн үед зарим УИХ-ын гишүүн, сайд сонгуулийн хуулийг илтэд зөрчиж хууль бус сурталчилгаа зохион байгуулсан нь сүүлийн үеийн мэдээллүүдээс нэгэнт тодорхой болжээ. Увс аймагт болсон спортын арга хэмжээний үеэр УИХ-ын гишүүн, Эдийн засаг хөгжлийн яамны сайд Ч.Хүрэлбаатар 1000 оюутанд 100 мянган төгрөг тараасныг тухайн аймгийн удирдлагууд хэвлэлд баримттай дэлгэж, Соёлын яамны сайд Ч.Номин мөн тайлан нэртэй уулзалт арга хэмжээ зохион байгуулан өөрийнхөө зурагтай сэтгүүл тараах, насанд хүрээгүй хүүхдүүдийг сонгуулийн сурталчилгаанд хууль бусаар оролцуулсан гэх мэдээллүүд гарсан.

Тэгвэл эл үйл явдлыг эсэргүүцэж төрийн эрх мэдлийг хууль бусаар авах оролдлогыг таслан зогсоохыг Сонгуулийн ерөнхий хороо, Монгол Улсын Ерөнхий сайдаас тус тус шаардаж иргэд нэгдэн 100 мянган иргэний гарын үсэг цуглуулсаар байгаа ажээ.

Ерөнхий сайд Л. Оюун-Эрдэнийн хувьд шударга бус авлигалын системтэй тэмцэж, шударга ёс тогтоох шинэчлэлд уриалан ажиллаж байгаа учраас Үндсэн хуулийн шинэчлэлээр шинэ 126 гишүүнтэй УИХ-д хуулийг уландаа гишгэж ард түмнийг доромжилсон этгээдүүд нэр дэвшиж сонгогдон төрийн өндөр албан тушаалд очихыг зөвшөөрөхгүй биз ээ. Төрийн сонгуулийн хуулийг тоохгүй зөрчиж байгаа хүмүүс төрд дахин сонгогдвол улс орноо таамаглах аргагүй аюул эрсдэл рүү дагуулах нь тодорхой хэмээн иргэд эсэргүүцсээр байна.